कुस्तीच्या मैदानात विनेश फोगटची सुवर्णपदकाला गवसणी

(sports news) आशियाई क्रीडा स्पर्धेत सुवर्णपदक पटकावणाऱ्या विनेश फोगटने अजून एका सुवर्णपदकाला गलसणी घातली आहे. जयपूर येथे भारतीय ऑलिम्पिक संघटनेच्या तदर्थ समितीने आयोजित केलेल्या वरिष्ठ राष्ट्रीय कुस्ती स्पर्धेत ५५ किलो वजनी गटात विनेशने सुवर्णपदक पटकावले. आपले अनुभवी कौशल्य दाखवत विनेशने तिची प्रतिस्पर्धी मध्य प्रदेशातील ज्योतीवर ४-० असा विजय नोंदवला. रेल्वे स्पोर्ट्स प्रमोशन बोर्डाचे प्रतिनिधित्व करणाऱ्या २९ वर्षीय खेळाडूने यापूर्वी २०१८ जकार्ता आशियाई क्रीडा स्पर्धेत ५० किलो गटात सुवर्णपदक जिंकले होते. तिने ५३ किलो वजनी गटात २०२२ च्या बर्मिंगहम कॉमनवेल्थ गेम्समध्येही विजय मिळवला होता.

साक्षी मलिककडून सुवर्णपदक

ऑलिम्पिक पदक विजेती साक्षी मलिकने विनेश फोगटला सुवर्णपदक प्रदान केले. साक्षी मलिक आणि विनेश फोगट यांनी बजरंग पुनियासोबत कुस्तीगिरांचे आंदोलनाला सुरूवात केली होती. डिसेंबरच्या अखेरीस विनेशने खेलरत्न आणि अर्जुन पुरस्कार परत करण्याची घोषणा केली होती. त्यांनी पंतप्रधान नरेंद्र मोदींना पत्र लिहून ही माहिती दिली. ब्रिजभूषण शरण सिंग यांचे सहकारी कुस्ती महासंघाचे अध्यक्ष झाल्यानंतर साक्षी मलिकने या खेळातून निवृत्तीची घोषणा केली होती.

दुसऱ्या एका सामन्यात, २०२१ ची वर्ल्ड चॅम्पियनशिप रौप्यपदक विजेती हरियाणाच्या अंशू मलिकने ५९ किलो वजनी गटात २०२० आशियाई चॅम्पियनशिप सुवर्णपदक विजेती सरिता मोर (रेल्वे) हिचा ८-३ असा पराभव केला. हरियाणाने १८९ गुणांसह अव्वल स्थान पटकावले. आरएसपीबी १८७ गुणांसह दुसऱ्या स्थानावर तर पुद्दुचेरी ८१ गुणांसह तिसऱ्या स्थानावर आहे. पुरुषांच्या ग्रीको-रोमन प्रकारात, आरएसपीबी एकूण २०८ गुणांसह विजेता ठरला, त्यानंतर आर्मी स्पोर्ट्स कंट्रोल बोर्ड (१२७ गुण) आणि महाराष्ट्र (११३ गुण) तिसऱ्या स्थानावर आहे. (sports news)