परराष्ट्रमंत्री जयशंकर यांच्या वक्तव्याची चीनला मिरची झोंबली!

भारताचे परराष्ट्र मंत्री एस जयशंकर यांच्याकडून भारत – चीन सीमा वादाबद्दल करण्यात आलेल्या वक्तव्याची चीनला चांगलीच मिरची झोंबलीय. यानंतर, चीन सरकारचं मुखपत्र ‘ग्लोबल टाइम्स’नं ‘भारताकडून सीमा वादाचं आंतरराष्ट्रीयीकरण करण्याचा प्रयत्न’ केला जात असल्याचं म्हटलंय. तसंच चीनला या मुद्द्यावर सतर्क राहण्याचा सल्लाही ग्लोबल टाईम्सनं दिलाय.’भारताचे चीनसोबतचे संबंध अत्यंत कठीण काळातून जात आहेत. चीनकडून सीमा कराराचं उल्लंघन करण्यात आलंय’ असं वक्तव्य भारताचे परराष्ट्र व्यवहार मंत्री एस जयशंकर यांनी केलं. ‘म्युनिक सुरक्षा परिषद २०२२’ मध्ये पॅनेल चर्चेदरम्यान ते बोलत होते.
यानंतर, ‘भारताचे परराष्ट्र मंत्री सुब्रह्मण्यम जयशंकर यांनी नुकतंच एका बहुपक्षीय चर्चेदरम्यान दोन वेळा चीन-भारत सीमा वादाचा उल्लेख केला आहे’ असा इशारा ग्लोबल टाईम्सनं चीन सरकारला दिला आहे.

आंतरराष्ट्रीय समुदायाच्या सामर्थ्याचा फायदा घेऊन भारत स्वतःला पुढे करण्याचा आणि सीमा वादाशी खेळण्याचा धोकादायक प्रयत्न करू शकतो. चिनी सरकारनं अशा धोकादायक प्रवृत्तींपासून सावध आणि सतर्क राहण्याची गरज आहे. चीनसोबत आपले संबंध सुधारण्याची, तडजोडीसाठी किंवा वाटाघाटीसाठी जागा सोडण्याची कोणतीही तयारी भारताकडून अद्याप दाखवण्यात आलेली नाही. त्याऐवजी, आधीच कमकुवत असलेल्या परस्पर विश्वासाला तडा जाणारे आणि संघर्ष अधिक तीव्र करणाऱ्या चिथावणीखोर शब्दांचा वापर भारताकडून केला जात आहे, असंही ‘ग्लोबल टाईम्स’नं म्हटलंय.

‘चायना इन्स्टिट्यूट ऑफ इंटरनॅशनल स्टडीज’मधील ‘एशिया-पॅसिफिक स्टडीज’ अभ्यास विभागाचे प्रमुख लॅन जियान्झू यांच्या म्हणण्यानुसार, भारताला आता द्विपक्षीय संबंधांतर्गत आपलं उद्दिष्ट साध्य करणं कठीण जातंय. त्यामुळेच, भारत चीनसोबत सीमा वादाचं द्विपक्षीय प्रकरण आंतरराष्ट्रीय पातळीवर नेण्याचा प्रयत्न भारताकडून केला जाऊ शकतो. याशिवाय, युक्रेन संकटावर तणाव वाढत असताना अमेरिका आणि पश्चिमात्य देशांचं लक्ष इंडो-पॅसिफिक क्षेत्राहून अधिक जास्त रशिया आणि युरोपवर आहे. त्यामुळे, भारत धास्तावला आहे. चीनसोबतच्या सीमावादाचा उल्लेख करून भारताकडून अमेरिकेचं लक्ष वेधण्याचा प्रयत्न केला जात आहे, जियान्झू यांनी म्हटलंय.
‘कोणत्याही दोन देशांच्या द्विपक्षीय मुद्द्यांवर या दोन पक्षांतच चर्चा व्हायला हवी, जिथे दोन्ही पक्ष त्यांच्या प्रमुख समस्या आणि मागण्या थेट मांडू शकतात. द्विपक्षीय वाद सोडवण्याचा हा सर्वात सोपा आणि प्रभावी मार्ग आहे’, असा शहाजोगपणाचा सूरही ‘ग्लोबल टाईम्स’नं आळवलाय.

‘सीमा विवाद हा भारत आणि चीनमधील द्विपक्षीय मुद्दा आहे. चीन आणि भारत यांच्यात त्यांच्यात मतभेद सोडवण्याची बुद्धिमत्ता आणि क्षमता आहे. कोणत्याही तृतीय पक्षाच्या हस्तक्षेपाला जागा नाही’ असं भारतातील चिनी दूतावासानं ऑक्टोबर २०२० मध्ये एका निवेदनात नमूद केलं होतं.