IPL 2022साठी बीसीसीआयचा मोठा निर्णय

भारतीय क्रिकेट नियामक मंडळाची गुरुवारी बैठक झाली. या बैठकीत एका मोठा निर्णय घेण्यात आला असून हा निर्णय आयपीएल २०२२ म्हणजेच १५व्या हंगामा संदर्भातील आहे. आयपीएल २०२२ मध्ये या वर्षीपासून ८ ऐवजी १० संघ असणार आहेत. यासाठीचा मेगा लिलाव फेब्रुवारी महिन्यात होणार आहे. सर्व संघ लिलावाची तयारीत असताना बीसीसीआयने स्पर्धेसंदर्भात मोठा निर्णय घेतलाय.
आयपीएल २०२२ मधील सर्व सामने मुंबई शहरात होणार असल्याचा निर्णय बीसीसीआयने घेतलाय. द टेलीग्राफने बीसीसीआयमधील सूत्रांच्या हवाल्याने हे वृत्त दिले आहे. या वर्षी आयपीएलमधील सर्व सामने मुंबईत आयोजित करण्यावर बीसीसीआयच्या बैठकीत सहमती झाली आहे. या वृत्तानुसार मुंबईत अधिक स्टेडियम आहेत आणि अन्य सुविधांचा विचार करता ही स्पर्धा येथे आयोजित करण्याचा निर्णय घेतलाय. अर्थात याची अधिकृत घोषणा आता नाही तर २० फेब्रुवारी रोजी केली जाऊ शकते.

याआधी बीसीसीआयचे सचिव जय शहा यांनी काही दिवसांपूर्वी आयपीएलचे आयोजन भारतात होणार असल्याचे म्हटले होते. आयपीएलचा १५वा हंगाम मार्च महिन्याच्या अखेरीस सुरू होऊ शकतो आणि मे महिन्याच्या अखेरपर्यंत तो चालेल, असे शहा म्हणाले होते
मुंबईत आयपीएलच्या १५व्या हंगामाचे सर्व सामने होण्याचे महत्त्वाचे कारण म्हणजे येथे एका पेक्षा अधिक स्टेडियम आहेत. आयपीएलसाठी वानखेडे, ब्रेबोर्न आणि डीवाय पाटील हे ३ स्टेडियम आहेत. तर गरज पडली तर पुण्याचा देखील यात समावेश केला जाऊ शकतो. यामुळे खेळाडूंना विमानाने प्रवास करण्याची गरज पडणार नाही. यामुळे करोनाचा धोका कमी होईल. दुसरे मोठे कारण म्हणजे मुंबईत फाईव्ह स्टार हॉटेलची संख्या देखील अधिक आहे. यामुळे खेळाडूंना राहण्यात कोणतीही अडचण येणार नाही. बायो बबलची निर्मिती सहजपणे या हॉटेलमध्ये केली जाऊ शकते.बीसीसीआयला आयपीएलच्या १४वा हंगामातील चुका पुन्हा करायच्या नाहीत. गेल्या वर्षी आयपीएलचे आयोजन भारतातील ६ ठिकाणी करण्यात आले होते. तेव्हा अहमदाबाद, बेंगळुरू, दिल्ली, मुंबई, चेन्नई आणि कोलकाता या शहरांची निवड करण्यात आली होती. पण खेळाडूंना करोना झाल्याने ही स्पर्धा मध्येच स्थगित करावी लागली आणि दुसरा टप्पा सप्टेंबर-ऑक्टोबरमध्ये युएईमध्ये आयोजित करावा लागला.