‘या’ कारणांमुळे सोनं महागणार

महागाई नियंत्रणासाठी अमेरिकेच्या फेडरल रिझर्व्हसह प्रमुख केंद्रीय बँकांनी व्याजदर वाढीचे संकेत दिले आहेत. परिणामी जागतिक कमॉडिटी बाजारात सोन्याचा भाव १८०० डॉलरवर गेला आहे. नजीकच्या काळात व्याजदर वाढले तर सोन (gold) पुन्हा १८५० ते १९०० डॉलरपर्यंत वाढेल, असा अंदाज व्यक्त करण्यात आला आहे. परिणामी भारतात देखील सोन ५० ते ५२ हजार रुपयांपर्यंत वाढेल, असा अंदाज व्यक्त करण्यात आला आहे.

कमॉडीटी बाजारात कच्च्या तेलाचा भाव ९३ डॉलर प्रती बॅरल इतका वाढला आहे. सोन्याचा भाव देखील वाढत आहे. फेडरल रिझर्व्हने मागील बैठकीत व्याजदर वाढण्याचे संकेत दिले आहेत. त्याशिवाय बँक ऑफ इंग्लडकडून देखील लवकरच पाव टक्क्याची व्याजदर वाढ केली जाण्याची शक्यता आहे. अशा परिस्थिती सोन्याला नवी झळाळी मिळण्याची शक्यता कमॉडिटी विश्लेषकांनी व्यक्त केली आहे.

मल्टी कमॉडिटी एक्सचेंजवर शुक्रवारी बाजार बंद होताना १० ग्रॅम सोन्याचा भाव ४७९४८ रुपये इतका होता. त्यात ३१ रुपयांची वाढ झाली. तत्पूर्वी सोन्याचा भाव ४७७०२ रुपये इतका खाली आला होता. एक किलो चांदीचा भाव ६०८५२ रुपये इतका आहे. चांदीमध्ये १२० रुपयांची वाढ झाली. गेल्या दोन आठवड्यात सोने आणि चांदीला नफावसुलीचा फटका बसला होता. सोने जवळपास ७०० रुपयांनी तर चांदीमध्ये एक हजारांची घसरण झाली होती.

Goodreturns या वेबसाईटनुसार शुक्रवारी मुंबईत २२ कॅरेट सोन्याचा (gold) भाव ४५१०० रुपये इतका आहे. २४ कॅरेटचा भाव ४९२०० रुपये इतका आहे. दिल्लीत सराफा बाजारात २२ कॅरेट सोन्याचा भाव ४५१०० रुपये इतका आहे. दिल्लीत २४ कॅरेटचा सोन्याचा भाव ४९२०० रुपये आहे. आज चेन्नईत २२ कॅरेटसाठी ४५४२० रुपये तर २४ कॅरेट सोन्याचा भाव ४९५५० रुपये इतका आहे. त्यात १२० रुपयांची वाढ झाली. कोलकात्यात आज २२ कॅरेट सोन्याचा भाव ४५१०० रुपये असून २४ कॅरेट सोन्याचा भाव ४९२०० रुपये इतका आहे.

जागतिक कमॉडिटी बाजारात आज सोन्याचा भाव १८०३ डॉलर प्रती औंस इतका वाढला. चांदीचा भाव २२.५५ डॉलर प्रती औंस झाला.काही महिन्यांपूर्वी सोन्याचा भाव १९३५ डॉलर इतक्या उच्चांकी पातळीवर गेला होता. मोतीलाल ओसवाल संस्थेचे कमॉडिटी विश्लेषक अमित सजेजा यांच्यामते सध्याच्या स्तरावर सोने खरेदीची संधी आहे. मागील एका महिन्यात सोन्याचा भाव १७८० डॉलर प्रती औंसच्या आसपास होता मात्र नजीकच्या काळात होणाऱ्या व्याजदर वाढीचा अंदाज घेतला तर सोने १८५५ डॉलरपर्यंत वाढू शकते. जर मध्यम कालावधीचा विचार केला तर सोन्याचा भाव १८६५ डॉलरपर्यंत वाढेल, असा अंदाज त्यांनी व्यक्त केला.

गोल्डमन सॅक्स या संस्थेने देखील सोन्याच्या भाववाढीबाबत सकारात्मक अंदाज व्यक्त केला आहे. गोल्डमन सॅक्सच्या मते चालू वर्षात सोन्याचा भाव २१०० डॉलर प्रती औंस इतका वाढण्याची शक्यता आहे. ज्याचे पडसाद भारतात देखील उमटतील आणि सोन्याचा भाव ६० हजारांवर जाऊ शकतो.