युक्रेनमध्ये बॉम्ब हल्ल्यात भारतीय विद्यार्थ्याचा मृत्यू

रशियाने युक्रेनवर हल्ला केल्यानंतर युद्धाचा भडका उडाला आहे. यामुळे युक्रेनमध्ये शिक्षणासाठी गेलेले शेकडो भारतीय विद्यार्थी अडकले आहेत. भारतीय विद्यार्थ्यांना मायदेशी विमानाने सुखरुप आणण्याचे प्रयत्नही सुरू आहेत. पण आशातच भारतासाठी एक मोठी बातमी येऊन धडकली आहे. रशियाने युक्रेनच्या खारकीव्हमध्ये केलेल्या बॉम्ब हल्ल्यात एका ( indian student lost his life in shelling in kharkiv ) भारतीय विद्यार्थ्याचा मृत्यू झाला आहे.
युक्रेनच्या खारकीव्हमध्ये आज सकाळी बॉम्ब हल्ले करण्यात आले. आज सकाळी झालेल्या बॉम्ब हल्ल्यात भारतीय विद्यार्थ्याचा मृत्यू झाला आहे. परराष्ट्र मंत्रालयाने संबंधित विद्यार्थ्याच्या कुटुंबीयांशी संपर्क साधला आहे. घटनेची माहिती कुटुंबीयांना देण्यात आली आहे, असे परराष्ट्र मंत्रालयाने म्हटले आहे. कर्नाटकच्या हावेरी जिल्ह्यातील नवीन शेखरप्पा या विद्यार्थ्याचा मृत्यू झाला आहे. हा विद्यार्थी फक्त २१ वर्षांचा होता आणि तो चौथ्या वर्षाला होता.
भारतीय परराष्ट्र मंत्रालयाचे प्रवक्ते अरिंदम बागची यांनी ट्विट करून ही माहिती दिली आहे. परराष्ट्र मंत्रालयाच्या सचिवांनी रशिया आणि युक्रेनच्या राजदुसांशी संवाद केला आहे. तसेच दोन्ही देशांकडे पुन्हा एकदा भारताची मागणी मांडण्यात आली आहे. युक्रेनमध्ये अडकलेल्या भारतीयांना सुरक्षित बाहेर काढण्यासाठी सहकार्य करावे, असे भारताने स्पष्ट केले आहे. खारकीव्हसह युक्रेनच्या इतर शहरांमध्ये अनेक भारतीय अजूनही अडकून आहेत, असे दोन्ही देशांना सांगण्यात आल्याचे अरिंदम बागची यांनी ट्विटमध्ये म्हटले आहे.

अशा प्रकारे रशिया आणि युक्रेनमधील भारतीय राजदुतांनी दोन्ही देशांमध्ये ही मागणी मांडली आहे, असे बागची म्हणाले.

परराष्ट्र मंत्रालयाने दिलेल्या वृत्ताला कर्नाटक सरकारने दुजोरा दिला आहे. कर्नाटकमधील विद्यार्थ्याचा मृत्यू झाल्याची माहिती मिळताच मुख्यमंत्री बोम्मई हे त्याच्या वडिलांशी बोलले. नवीनचे पार्थिव मायदेशात आणण्यासाठी सर्व प्रयत्न केले जात आहेत. यासंदर्भात परराष्ट्र मंत्रालयाच्या अधिकाऱ्यांशी चर्चा सुरू आहे, अशी माहिती कर्नाटकच्या मुख्यमंत्री कार्यालयाकडून देण्यात आली आहे.
नवीन शेखरप्पा हा या विद्यार्थ्याचा युक्रेनमधील हल्ल्यात मृत्यू झाला आहे. हा विद्यार्थी हावेरी जिल्ह्यातील चलगेरी येथील राहणारा होता. स्टोअरमधून खाण्यासाठी काही वस्तू आणण्यासाठी तो बाहेर पडला होता. पण काहीवेळाने त्याच्या मित्रांना स्थानिक अधिकाऱ्यांचा फोन आला. नवीनचा हल्ल्यात मृत्यू झाल्याचे त्यांनी मित्रांना सांगितले, अशी माहिती कर्नाटकच्या आपती व्यवस्थापन विभागाचे आयुक्त मनोज रंजन यांनी दिली.
युक्रेनमध्ये अडकलेल्या भारतीयांना सुरक्षित मायदेशात आणण्याचे प्रयत्न सुरू आहे. यासाठी भारत सरकारने ‘ऑपरेशन गंगा’ ही मोहीम उघडली आहे. आतापर्यंत ९ विमानांद्वारे युक्रेनमध्ये अडकलेल्या शेकडो भारतीयांना मायदेशात आणण्यात आलं आहे. आता हंगेरीच्या बुडापेस्टमधून आज संध्याकाळी इंडिगो एअरलाइन्सच्या विमानाने २१६ भारतीयांना आणले जाईल. हे विमान उद्या सकाळी ७.२० मिनिटांनी दिल्ली विमानतळावर उतरले, अशी माहिती सूत्रांनी दिली आहे.
बुडापेस्ट, बुखारेस्टमधून उद्या दिवसभर अनेक विमानांची उड्डाणं होतील. ही विमानं दिल्ली विमानतळावर संध्याकाळी उशिरा उतरतील. भारत सरकारने एकूण २० विमानांची उड्डाणं नियोजित केली आहेत. यात एअर इंडिया, एअर इंडिया एक्स्प्रेस, इंडिगो, स्पाइस जेट या विमान कंपन्यांची विमानं उड्डाण घेतील. याशिवाय भारतीय हवाई दलाची विमानंही या मोहीमेत सहभागी होणार आहेत.