पत्नीच्या वाढदिवशी जयंत पाटलांची फेसबुक पोस्ट व्हायरल
राष्ट्रवादी काँग्रेसचे नेते प्रदेशाध्यक्ष जयंत पाटील हे येन:केन कारणेन सातत्याने चर्चेत असतात. त्यांची राजकीय वक्तव्यं आणि भूमिका असोत किंवा एखाद्या नेत्याविषयी, घटनेविषयी केलेली मिश्किल टिप्पणी असो जयंत पाटील (Jayant Patil) नेहमीच लक्ष वेधून घेताना दिसतात. आतादेखील जयंत पाटील यांची सोशल मीडियावर पोस्ट चर्चेचा विषय झाली आहे. जयंत पाटील यांनी त्यांची पत्नी शैलजा पाटील यांच्या वाढदिवसानिमित्त सोशल मीडियावर पोस्ट केली आहे. यामध्ये जयंत पाटील आणि शैलजा पाटील यांची तरुणपणीची छायाचित्रं आहेत. हे फोटो सध्या सोशल मीडियावर चांगलेच व्हायरल होत आहेत. त्यांच्या या पोस्टवर शुभेच्छा आणि प्रतिक्रियांचा पाऊस पडत आहे.जयंत पाटील यांनी या पोस्टमध्ये आपल्या पत्नीचे आभार मानले आहेत. माझ्या यश-अपयशात, सुख-दुःखात नेहमीच साथ दिलीत, आयुष्याच्या प्रत्येक वळणावर खांद्याला खांदा लावून माझ्या संगिनी बनलात. शैलजा, तुम्ही खऱ्या अर्थाने माझी सहचारिणी ठरलात. तुम्हाला वाढदिवसाच्या खुप खुप शुभेच्छा, असे जयंत पाटील यांनी म्हटले आहे.जयंत पाटील नुकतेच केदारनाथाच्या दर्शनाला गेले होते. त्यांनी सोशल मीडियावर फोटो टाकून याबाबत माहिती दिली होती. संपूर्ण कुटुंबासह बारा ज्योतर्लिंगांपैकी एक असलेल्या प्राचीन अशा केदारनाथ मंदिरात जाऊन महादेवाचे आणि बद्रीनाथ येथे भगवान विष्णूचे दर्शन घेतले. विशाल पर्वतांनी सामावून घेतलेल्या, निसर्गाचे वरदान असलेल्या या भूमीचे पावित्र्य मनाला सकारात्मकता देऊन गेले, अशी भावना जयंत पाटील यांनी व्यक्त केली आहे.