किरीट सोमय्यांनी शिवसेनेला डिवचलं

उद्धव ठाकरे हे स्वत: पोलीस आयुक्त झाले तरी माझ्यावर कारवाई करू शकत नाहीत, अशा शब्दांत भाजप नेते किरीट सोमय्या यांनी पुन्हा एकदा शिवसेनेला डिवचले आहे. माझी पत्नी मेधा सोमय्या आणि नील सोमय्या यांच्यावरही कारवाई होणे शक्य नाही. कारण घोटाळे हे उद्धव ठाकरे यांनी केले आहेत. त्यामुळे तुम्ही घोटाळे करायचे आणि कारवाई आमच्यावर कशी काय होऊ शकते, असा सवाल किरीट सोमय्या यांनी उपस्थित केला. ते मंगळवारी मुंबईत प्रसारमाध्यमांशी बोलत होते.
यावेळी किरीट सोमय्या यांनी सत्र न्यायालयात त्यांचा मुलगा नील सोमय्या यांनी केलेल्या अटकपूर्व जामीन अर्जाबाबत विचारणा करण्यात आली. त्यावर किरीट सोमय्या यांनी म्हटले की, माझ्यावर कारवाई करणार असे ठाकरे सरकारमधील मंत्री सांगत आहेत. पण उद्धव ठाकरे पोलीस आयुक्त झाले तरी माझ्यावर कारवाई शक्य नाही. राज्यातील जनतेला कळालं आहे की, नील सोमय्या निर्दोष आहेत. मुंबई पोलिसांनी त्यांना निर्दोष ठरवलेले नाही. त्यामुळे मुंबईच्या आयुक्तपदावरून हेमंत नगराळे यांना हटवण्यात आले, असा आरोप सोमय्या यांनी केला. यावेळी त्यांनी संजय राऊत यांच्यावरही निशाणा साधला. संजय राऊत हे नौटंकीबाज आहेत. कसला गेम बिगीन, ईडीने बंदूक दाखवली तो डेकोरेटर कुठे आहे? हेमंत नगराळे यांची आयुक्तपदावरून हकालपट्टी का झाली, याचे उत्तर द्या, अशी मागणी सोमय्या यांनी केली.
माजी पोलीस आयुक्त परमबीर सिंह यांनी ठाकरे सरकारला गोत्यात आणल्यानंतर मुंबईच्या आयुक्तपदाचा कारभार हेमंत नगराळे (Hemant Nagrale) यांच्याकडे सोपवण्यात आला होता. मात्र, गेल्या काही महिन्यांमध्ये भाजप नेत्यांविरुद्ध कारवाई करण्यात असमर्थ ठरल्यामुळे हेमंत नगराळे यांची आयुक्तपदावरून उचलबांगडी झाल्याची चर्चा आहे. एकीकडे केंद्रीय तपासयंत्रणांनी महाविकासआघाडीचे मंत्री आणि नेत्यांविरुद्ध कारवाईचा सपाटा लावला असताना हेमंत नगराळे भाजप नेत्यांविरुद्धच्या आरोपांनंतर कारवाई करताना फारशी तत्परता दाखवत नव्हते. त्यामुळेच हेमंत नगराळे यांची राज्य सुरक्षा महामंडळाचे व्यवस्थापकीय संचालक म्हणून बदली करून त्यांना एकप्रकारे साइड पोस्टिंग दिल्याचे बोलले जात आहे. तर ठाकरे सरकारच्या मर्जीतील संजय पांडे यांच्याकडे मुंबईच्या आयुक्तपदाचा कारभार देण्यात आला आहे.