अमित शाहांच्या गृहमंत्रालयात हनी ट्रॅप; गोपनीय माहिती पाकला दिली?

गृह मंत्रालयातील कंत्राटी कर्मचारी नवीन पाल याने ‘हनी ट्रॅप’मध्ये अडकून गोपनीय माहिती पाकिस्तानला दिल्याचे तपासात उघड झाले आहे. ‘जी-२०’ शिखर परिषदेच्या कागदपत्रांसह विविध गोपनीय कागदपत्रे पाल याने पाकिस्तानला पुरवली. या प्रकरणी पोलिसांनी गुन्हा दाखल करून, पाल याला अटक केली असून, त्याच्याकडे चौकशी सुरू आहे.

अंजली नावाची ही महिला कोलकात्यातील असल्याचा आपला समज असल्याचे पाल याने चौकशीत म्हटले आहे. महिलेने पाल याला प्रेमाच्या जाळ्यात अडकवले होते. मात्र, संबंधित महिला कराचीमधील असल्याचे पोलिस तपासात उघड झाले. पाकिस्तानच्या ‘आयएसआय’ या गुप्तहेर संस्थेशी तिचा संबंध असल्याचे मानले जाते. माहिती मिळवण्यासाठी या महिलेने पाल याला ऑनलाइन माध्यमातून ८५ हजार रुपये दिले होते.

नवीन पालचे शिक्षण बारावीपर्यंत झाले असून, तो दिल्लीतील भीमनगरमध्ये राहतो. केंद्रीय गृह मंत्रालयात बहुद्देशीय कर्मचारी म्हणून तो कंत्राटी स्वरूपात कामाला आहे. केंद्रीय गृह मंत्रालयातील कर्मचारी माहिती बाहेर पाठवत असल्याचे गुप्तचर संस्थांना समजले होते. त्यानुसार तपास केल्यावर पाल याच्याबद्दल माहिती समोर आली. त्याचे फोन कॉल व व्हॉट्सॲपचे तपशील तपासल्यानंतर या प्रकरणाचा उलगडा झाला.

कुरुलकर यांचे एका महिलेशी अनैतिक संबंध

डॉ. प्रदीप कुरुलकर यांनी संशोधन व विकास संस्थेचे (आर अँड डीई-ई) काम मिळवून देण्याच्या आमिषाने एका महिलेशी अनैतिक संबंध ठेवल्याचे तपासात उघडकीस आल्याचे दहशतवाद विरोधी पथकाने (एटीएस) न्यायालयात दाखल केलेल्या आरोपपत्रात (charge sheet) नमूद केले आहे. महिलेने याबाबत अद्याप पोलिसांकडे तक्रार दिलेली नाही.

‘एटीएस’ने डॉ. कुरुलकर यांच्याविरोधात विशेष न्यायाधीश व्ही. आर. कचरे यांच्या न्यायालयात एक हजार ८३७ पानांचे दोषारोपपत्र नुकतेच दाखल केले आहे. कुरुलकर यांनी पाकिस्तानी हेर झारा दासगुप्ता हिच्याशी सोशल मीडियाच्या माध्यमातून केलेल्या संवादाची प्रत ‘एटीएस’ने न्यायालयात दाखल केलेल्या दोषारोपपत्रात जोडली आहे. या संवादातून कुरुलकर यांनी झाराबरोबर ‘अग्नि’, ‘ब्राह्मोस’, ‘रुस्तम’ या क्षेपणास्त्रांविषयी चर्चा केल्याची धक्कादायक माहिती उघडकीस आली आहे.

तपासाचा भाग म्हणून कुरुलकर यांना त्यांच्या सरकारी गेस्ट हाउसमध्ये कोण महिला भेटायला आल्या होत्या, त्या महिलांचा शोध घेऊन त्यांचा जबाबही ‘एटीएस’ने नोंदवून घेतला आहे. त्यात ‘आर अँड डीई-ई’ या संस्थेतील विविध कामांचे कंत्राट मिळावे; म्हणून महिलेने कुरुलकर यांच्याशी जवळीक साधली होती. संबंधित महिला आणि कुरुलकर यांच्यातील संभाषणही ‘एटीएस’ला मिळाले आहे. ते आरोपपत्रात (charge sheet) नमूद केले आहे. कुरुलकर त्या महिलेला सरकारी गेस्ट हाउसमध्ये भेटले होते. मात्र, संबंधित महिलेने अद्याप कोणतीही तक्रार दिलेली नाही. या गुन्ह्यात कलमवाढ होण्याची शक्यता एटीएस अधिकाऱ्यांनी व्यक्त केली आहे.