भंगार दुकानात निकामी बॉम्बशेलचा स्फोट; एकाचा मृत्यू तर एक जखमी

भंडारा रोडवरील स्थित कापसी येथे भंगार गोदामात निकामी बॉम्बशेल कटरने कापत असताना स्फोट झाला. यामध्ये एका मजूराचा जागीच मृत्यू झाला तर एक गंभीर जखमी झाला. गुड्डु भभूतलाल रतनेरे (वय ५२, उप्पलवाडी) असे मृत मजूराचे नाव आहे. ही घटना सोमवारी सायंकाळी घडली. या घटनेची नोंद पारडी पोलिस ठाण्यात झाली आहे.

पोलिसांनी दिलेल्या माहितीनुसार, हसनबाग येथील अब्दुल रशीद वल्द अब्दुल अजीज (वय ४८) यांचे बाराद्वारी येथे ए.आर. ट्रेडर्स नावाचे भंगाराचे गोदाम आहे.

अब्दुल रशीद यांनी ३० मे रोजी पुलगाव येथील ऑर्डनन्स फॅक्टरीतून निकामी दारूगोळा लिलावात विकत घेतला होता. हा दारूगोळा कटरने कापून त्याचे भाग वेगळे करण्याचे काम सुरू असताना त्यातील एका बॉम्बशेलचा स्फोट झाला. यामध्ये गुड्डु रतनेरे हे जागीच ठार झाले. तर सुमीत सुकरलाल मरसकोल्हे (वय १९) हा जखमी झाला. त्याला दुर्गावती नगर येथील आयुष्मान हॉस्पिटलमध्ये उपचारासाठी दाखल केले आहे.