अल्पवयीन तरुणीवर पोलिसाने अत्याचार केल्याचा धक्कादायक प्रकार उघडकीस

(crime news) नेरुळ येथील बालाजी टेकडी परिसरात मित्रासह फिरण्यासाठी गेलेल्या एका १६ वर्षीय महाविद्यालयीन तरुणीला कथित पोलिसाने धमकावून तरुणीसह असलेल्या तरुणाला त्या ठिकाणावरून दमदाटी करून पिटाळून लावून या अल्पवयीन तरुणीवर लैंगिक अत्याचार केल्याचा धक्कादायक प्रकार उघडकीस आला आहे. नेरुळ पोलिसांनी या प्रकरणातील अज्ञात पोलिसांविरोधात बलात्कारासह पोक्सो कलमानुसार गुन्हा दाखल करून आरोपीचा शोध सुरू केला आहे.

या घटनेतील १६ वर्षीय अल्पवयीन पीडित तरुणी विज्ञान शाखेची विद्यार्थिनी असून ती नेरुळ रेल्वे स्टेशनजवळच्या एका खासगी क्लासमध्ये शिकण्यासाठी येते. मागील बुधवारी रात्री ८.३० वाजता ही पीडित तरुणी क्लासमधून सुटल्यानंतर मित्रमैत्रिणींसह नेरुळ सेक्टर-२२ येथील बालाजी मंदिरालगत असलेल्या टेकडीवर फिरण्यासाठी गेली होती. त्याठिकाणी पीडित तरुणी आपल्या मित्रासह थांबली, तर तिची एक मैत्रीण व इतर तीन मित्र हे चौघे या दोघांची वाट पाहत खाली उभे राहिले. याच दरम्यान टेकडीवर आलेल्या एका पोलिसाने पीडित तरुणीला व तिच्या मित्राला हटकून तरुणीसोबत असलेल्या मित्राला त्याठिकाणावरून दमदाटी करून पिटाळून लावले व त्यानंतर त्या पोलिसाने पीडित तरुणीवर लैंगिक अत्याचार केल्याचे पीडित तरुणीने आपल्या तक्रारीत म्हटले आहे. (crime news)

या घटनेनंतर पीडित तरुणीने आपले घर गाठून घडल्या प्रकारची माहिती आपल्या कुटुंबियांना दिल्यानंतर त्यांनी आपल्या मुलीवर प्राथमिक उपचार करून नेरुळ पोलीस ठाण्यात तक्रार दाखल केली. त्यानुसार पोलिसांनी अज्ञात पोलिसांवर बलात्कारासह पॉक्सो कलमाखाली गुन्हा दाखल करून त्याचा शोध घेण्यास सुरुवात केली आहे. पोलिसांनी या घटनेतील आरोपीचा शोध घेण्यासाठी परिसरातील सर्व सीसीटीव्ही फुटेजची तपासणी सुरू केली आहे. तसेच पीडित तरुणीने व तिच्या मित्राने दिलेल्या माहितीवरून आरोपीचे रेखाचित्र तयार करून त्यावरून आरोपीचा शोध सुर केला आहे. मात्र अद्याप पोलिसांच्या हाती काहीच लागलेले नाही.