कुपवाड -कवलापूर रस्त्यावर धारधार शस्त्राने खून

(crime news) कुपवाड -कवलापूर रस्त्यावर बामणोली कमानीलगत रविवारी रात्री अज्ञातांनी धारदार शस्त्राने डोक्यात वार करून तडीपार गुंडाचा खून केल्याची घटना घडली. अमर राजेंद्र जाधव (वय 27, रा. शांत कॉलनी, कुपवाड) असे तरुणाचे नाव आहे.

अमर जाधव याला दीड महिन्यापूर्वी तडीपार करण्यात आले होते. रविवारी (दि.16) रात्री दुचाकीवरून (एम.एच.10, डी.एम.- 4127) वरून बामणोलीकडून घराकडे जात होता. बामणोली कमानी लगत दबा धरून बसलेल्या काही अज्ञातांनी अमर याच्यावर धारदार शस्त्राने डोक्यात वर्मी घाव घालून हल्ला केला. अमर हा रक्ताच्या थारोळ्यात निपचित पडल्याचे दिसून येताच हल्लेखोरांनी धारदार हत्यार घटनास्थळी टाकून पलायन केले. घटनेची माहिती मिळताच सहाय्यक पोलिस निरीक्षक अविनाश पाटील, पोलिस उपनिरीक्षक विश्वजित गाडवे यांच्यासह पोलिसाचे पथक घटनास्थळी दाखल झाले.

रक्ताच्या थारोळ्यात पडलेल्या अमर जाधव याला पोलिसांनी तातडीने मिरजेतील सिव्हिल हॉस्पिटलमध्ये दाखल केले. उपचार सुरू असताना त्याचा मृत्यू झाला. हल्ल्याचे कारण समजू शकले नाही. (crime news)